La tierce sale e je dedicade ae lavorazion dal lat, par fâ il formadi, la spongje e la scuete.
In principi dal vincjesim secul tal cjanâl a jerin disevot latariis, tantis a son restadis in vore fin tal 1976, cuant che il taramot al à segnât la fin dal mont dal arlevament tradizionâl e dal fâ fen.

Lis vacjis si molzevin dôs voltis in dì: la matine adore, tor lis sîs, e la sere sul lâ a mont dal soreli. Tignût di bande il lat che al coventave pe gulizion e pe cene, il rest dal lat si lu puartave te latarie sociâl. Il contadin al puartave il lat che si pesave: il casâr al segnave la cuote di lat di ogni famee intun libret. Prime de pese, cualchi volte, si provinave il lat par viodi che no lu vessin slungjât cu la aghe.

Duncje, il lat, passât par un tamês par gjavâ sporcheçs, si lu meteve in contignidôrs di ram, luncs e strents, che dopo a jerin lassâts intune vascje di aghe corinte par stâ tal fresc. Li il lat al restave almancul dodis oris, fin che al deve sù il cjapiel, che si gjavave e si meteve te pigne par fâ la spongje.

La pigne e je une sorte di bote, poiade suntun basament. Il cjapiel dal lat, vâl a dî la pane, si meteve intal cilindri cuntun bocheton che po si sierave stagn. Dopo si faseve zirâ la bote, a man, in doi di lôr, o in timps plui resints cuntun aparât mecanic. Cussì la pane e jere batude fin che si deve dongje la spongje.

La spongje si gjavave e si meteve tai siei stamps cun dissens intaiâts tal tapon e su lis bandis. Si dopravin motîfs artistics diviers, une vacje, une rose, o une figure di mont, che po a restavin tai pans di spongje che a vevin un pês di un chilo o mieç chilo. La spongje si leve a cjapâle di sere e tal libret si segnave ancje trope che i tocjave a ognidun.

Il lat sbrumât, invezit, al vignive metût inte grande cjalderie di ram che e funzionave cul sisteme svuizar dal carel: lis cjalderiis a jerin fissis intant che il fornel cul fûc al jere mobil. Dopo vê impiât il fûc tal fornel mobil, il casâr al scjaldave il lat fin a rivâ a une temperadure di plui o mancul 42°C (par viodi se al jere just, al meteve dentri intal lat un termometri). Rivâts ae temperadure, il casâr al moveve il fornel zirant une manuele e lu parave sot de cjalderie di mieç, chê plui piçule, che e veve la aghe di netâ.

Tal lat scjaldât al zontave il cali, pe preparazion de caglade. Stant che il lat al piave prime parsore vie, intant che sot al restave in tante part licuit, il casâr al doprave la ghitare, un grant telâr retangolâr cun tantis cuardis sutilis, tant che chês di une ghitare, che e permeteve di rompi il strât disore fin a vê une masse omogjenie in dut il cjalderon.

La caglade si  di gnûf cul fornel: cheste cuete e rivave fin tor dai 50°C. Po dopo si le gjavave cul têl e si le meteve in stamps di len taronts. Il formadi al vignive pressât cuntun turcli a man par une zornade, in mût che al cjapàs la forme taronde carateristiche des piecis. Po si veve di salâlu te salmuerie. La stagjonadure si faseve metint su breis di len lis piecis di formadi par judâ a lâ insom i fenomens di fermentazion.

Intes malghis, par fâ la spongje si meteve la pane inte pigne, un contignidôr a dovis di forme cilindriche. Il tapon cul mani al veve une buse tal mieç par fâ passâ la mace, che dentri tal cilindri e faseve lâ sù e jù  un disc di len larc pôc di mancul de pigne.
Dopo metude la pane, il cilindri al vignive sierât e po dopo si menave la mace. Par fâ la spongje si veve di menâ plui o mancul un pâr di oris.

Il burro che per evitare diventasse acidulo veniva messo sul fuoco e fuso, poteva essere conservato in contenitori di pietra di forma cilindrica con il fondo panciuto e poi coperti da un coperchio di legno oppure in recipienti di terracotta.

Par che la spongje, cul timp, no les di mâl, si le disfave sul fûc, e cussì si faseve l’ont che si meteve tes pilis di piere, sieradis cuntun tapon di len, o in cualchi cit di crep.
Par ce che al tocje la preparazion dal formadi intes malghis, une volte fate la caglade si le rompeve doprant la glove: la forme plui semplice e jere un ramaç di frassin netât che insom si veve lassât il prin toc dai siei ramaçuts, se di no e podeve jessi une aste lungje un metri e trente cun insom pivots di une desene di centimetris fissâts di dutis lis bandis. Il cali si faseve in cjase secjant il stomi dal cjavret o dal agnel o dal vidiel.

Intes malghis si faseve ancje la scuete. Dopo gjavade la caglade al restave il sîr. La cjalderie e vignive metude sul fûc e si spietave che il sîr al des sù il bol. A pene che parsore si formave une sbrume fisse si strucjave sul ôr aghe frescje cun sâl o asêt. Une reazion chimiche e faseve vignî sù la scuete che dopo si cjapave cuntune cjace forade e butade suntune taule. Prime fracant cu lis mans si faseve cori il sîr e dopo si cuinçave cun sâl e grans di pevar. Par conservâ la scuete si le pressave in pilis di piere e si le taponave cun scartòs di panole dismuelâts inte aghe.

• Inte instalazion multimediâl a son filmâts interessants su:
  1- La lavorazion dal lat fate in cjase dal ultin casâr de val, Albino Micottis
  2- La vite in malghe a Chisalize/Kisalica contade di Valenzio Culetto
  3- La tradizion dal Pust, il Carnevâl ancjemò vîf vuê inte frazion di Micotis. Une volte, dilunc di dut il Carnevâl, i oms si devin adun a preparâ costums, dialics, senis e a fasevin a gare a cui che al faseve di plui, in mût che, la ultime dì di Carnevâl, no si podès dismenteâle almancul par un an. Ducj i fats, plui o mancul di tarizâ, che a jerin sucedûts o che si diseve che a jerin sucedûts dilunc dal an intes frazions, a vignivin ricuardâts, butâts in muse, rapresentâts cun senis dal vêr. Inte Alte Val de Tor chestis senutis a jerin metudis sù in place, intes vals dal Cuarnap si fasevin intes cjasis plui grandis.
  4- La tradizion dal Pust, Carnevâl a Cergneu
  5- La tradizion dal fûc di Sant Zuan a Musi