Su la jentrade de sale a son i imprescj dal cjaliâr e scarpis, scarpets e çucui. A cjaminavin pal plui discolçs o cun scarpets o çucui di len fats a man. Lis feminis a viodevin di cusì i scarpets. Ju cusivin a man e a filzetavin lis suelis cun ponts fis e cun tante abilitât. Lis suelis a jerin fatis di tocs di tele pleâts tantis voltis, cjapâts di vecjos bleons fin a jessi grues doi o plui centimetris: si cusivin cul spali di cjanaipe e dopo a batevin plui voltis cul martiel. Su chestis suelis a cusivin la tomere di frustagn fodrade di regadin o di vilût neri fodrât di tele gnove e blancje: chei ca a jerin i scarpets di dîs di fieste.
La seconde sale e je dedicade ai mistîrs
Il cjaliâr
I çucui ju fasevin i oms. Par tiere a son bancs cuntune smuarse che si sierave cul pît. Une volte fermât il toc di len inte smuarse, il marangon sentât su la bancje lu intaiave fin a fâ fûr il çucul. Cuasi ducj i çucui si metevin dopo di vê metût tai pîts i scufons di lane: i çucui, di fat, no son ducj cuvierts di une tomere di corean, ma a àn dome une cengle largje cualchi centesim fissade sul ôr di len. Dome lis dalminis di Invier a vevin dute la tomere di corean.
Di Invier la int de val e scugnive meti ancje clauts grues sot des suelis par no sbrissâ su la glace. Plui incà tal timp si à tacât a doprâ i sgrifs di fissâ tes suelis. I çucui cui clauts o cui sgrifs si podevin doprâ ancje vie pe stagjon par lâ a seâ su lis rivis plui ertis.
I imprescj doprâts dal cjaliâr a jerin ancje il scarpel, la splane, lis formis pes tomeris. Al è particolâr l’imprest fat di un çoc di len là che e je fissade une incuinele di fier a forme di pît che i permeteve al cjaliâr di bati lis brucjis te suele des scarpis
La lavorazion de lane
La lavorazion de lane e je restade vive intal Alt Cjanâl de Tor fin tal 1976, an dal taramot. Tor la metât dal secul XIX si à tacât a tignî mancul pioris e invezit a tignî une vore di plui lis vacjis. Ma cundut che il lat si molzeve des vacjis, no si à lassât, par chel, di lavorâ la lane. Ogni famee e je lade indevant a tignî cualchi piori par vê la lane. I materiâi di cheste ativitât a son conservâts intal museu.
Tun panel a son lis fuarpiis par tosâ lis pioris. A son fatis come par antîc, cuntun sôl toc di fier pleât. Des dôs bandis il metal al è batût in forme di lame, largje insot e fine in ponte.
La lane tosade si petenave, si passave cul sgarç, fat di dôs breis cuntune schirie di brucjis finis impiradis di une bande. Une des breutis e je fissade suntune casse di len insom di une bancje dulà che al steve sentât cui che al veve di sgarzâ.
Si filave cul fûs e cu la rocje o ben cul sisteme plui sofisticât de corlete. Il Museu al met in mostre picjâts tun panel un pôcs di fûs e tal mieç de stanzie i corlis. Lis corletis si dividin in dôs sortis: chês cul telâr orizontâl e chês verticâls. Une altre variante e je la cidule che e pues vê i rais o jessi plene. Dispès si univin doi fîi intun cul corli, par fâ la lane plui fuarte e plui gruesse.
Par fâ sù il fîl intune ace si doprave la daspe che e zirave: a ‘nd è dôs su la gjoce sot dal panel. Chê plui semplice e je fate di un ramaç di pin pleât che al ten sù il pivot cui braçs par tignî la madasse. Chel altri esemplâr al è di fate plui fine e al à un supuart verticâl che al sosten l’as orizontâl cun cuatri rais e ancjetantis traviersis di len. L’imprest si môf a man cuntune manuele di len.
In cheste sale e je ancje une maçuele. Al è un strument di len doprât par scjavaçâ o rompi i fuscj di lin in mût di netâ vie il len de fibre.
Il fen
La provision dal fen e jere pe int de val une des ativitâts plui impuartantis e si calcolave il cûr di dute la struture economiche de val. Il costum di tignî lis bestiis simpri intes stalis, al obleave la int a puartâ simpri mangjadure o drete te stale o tal toblât.
I prâts miôr par seâ no jerin comugnâi. Ogni famee a ‘nd veve, ma a jerin prâts lontans tra di lôr e avonde piçui.
I prâts che a jerin tor dai paîs si seavin a Mai. I prâts no vignivin semenâts cun jerbis di foraç, ma dome coltâts. In cheste maniere si podeve fâ ben trê tais: a Mai, a mieç Istât e l’ultin i prins dîs di Novembar. Su lis monts si seave dome une volte, a Lui o Avost.
A fâ fen tal šenozet, il prât di seâ, e leve dute la famee, ancje i fruts e i viei.
La sesule di jerbe che e podeve vê un mani lunc fin a 28 cm si doprave sù in rive. Il falcet invezit al jere lunc, cu la mace, dôs mantiis e la lame.
Cuant che si leve a seâ a coventavin simpri i imprescj par uçâ la lame. Par solit ogni setôr al veve picjât te cinture il codâr e la côt. Il museu al met in mostre tancj esemplârs di codâr e di côts. Tra ducj a son interessants cheis codârs che a àn sot dôs spicis cussì che si podeve impirâju par tiere. Lis côts a vevin un mani di len e la piere di calcâr silicifar fissade cuntun filistrin. Si doprave ancje la piere cence mani.
Par uçâ la lame dal falcet e plui di un precîs par ribati i dincj e lis stuartis si dopravin la batadorie e il martiel. La batadorie e je come un grues claut scuasi in forme di incuin staronzade parsore e a spice de bande che si impirave par tiere.
Cul cjalt dal Istât si molave di seâ a undis di matine. Dilunc de polse si destinave il puest pai côi che si preparavin sot sere par parâ il fen dal bagnum de gnot. La dì dopo i fruts a sparniçavin il fen dai côi sul prât. Vie pal dì si rivoltave la jerbe seade par suiâle ben.
Par chel si dopravin i ristiei. Par fâ i dincj dal ristiel si doprave un imprest di len di forme di canele vueide tal mieç là che e jere une buse cui ôrs di fier ben uçâts. Un bachet di len si impirave tal ôr de buse e si bateve cuntun martiel di len, cussì al vignive fûr grues simpri compagn.
Sot sere si viodeve di menâ jù il fen in paîs. Se i prâts a jerin lontans si fasevin trê o cuatri côi.
Il fen si menave jù in diviersis manieris. Pal solit a schene, cjamant il fen inte cosse o inte zbrincija, che e jere come la cosse ma plui grande.
Se il prât nol jere tant in rive si preparave une cjame di fen dade dongje cu lis cuardis. Lis cuardis a jerin trê: dôs lungjis paralelis e une plui curte par traviers. Lis cuardis si poiavin par tiere e dopo si metevin parsore i manei di fen. Cun lincins di len si tiravin lis cuardis. Po la cjame di jerbe si puartave sul cjâf.
Cun chescj sistemis si puartave ancje il fen taiât des medis, che in cualchi câs si taiave câs cul snizil, imprest par taiâ il fen, fat di une lame a forme di lunete tant uçade e un mani lunc cuntune stafe par fâ fuarce cul pît.
Altris struments
Altris struments leâts al mont de agriculture esponûts intal museu a son i ristiei pes fueis che a àn une lungje dintidure di fier e i fiers di specolâ lis panolis.
E je particolâr une sorte di bree di len che si leave sot dai pîts, grande plui o mancul come un sfuei di cjarte: tal mieç e veve la sacume par meti il pît, che si leave cuntune cengle di corean o di cuarde: si doprave intai orts e intai cjamps par taponâ di tiere lis busis de semence.
Al è ancje un maçûl doprât dai fruts par ribati, justâ e finî i bârs di tiere svegrâts, in mût che si podès semenâ.
Poiâts par tiere a son lis stangjis de louze, la sorte di slite che si doprave par puartâ il ledan o il fen su la nêf. Si tirave a man, pai lonzons, lens pleâts che a vignivin sù des stangjis e si fissavin tal telâr.
Interessant al è ancje il ripoi pe cosse, in bande dal barcon. Al è fat di un sôl toc di len che si slargje in forme di A. A une cierte altece des gjambis a jerin impirâts doi spiergui che a tignivin sù un breoncin là che si poiave la cosse par cjamâ dentri il ledan.
Si fasevin ancje zeis di vencs o lesculis, cu la forme carateristiche di nît, cui flancs larcs e la bocje strente, o a forme taronde e plui vierte di une bande, cul mani. Cualchi esemplâr al è in mostre te sale.
Lis fotografiis adalt a documentin cemût che i oms a fossin ancje bogns boscadôrs. I boscs miôr a jerin chei di Musi. I lens puartâts a spale o cu lis cossis e plui tart cu lis teleferichis si intassavin in bande des fontanis de Tor in spiete di menâlu. Lis taiis si butavin ta la aghe e si sburtavin o strissinavin cui rimpins, che a son fiers tacâts tun mani lunc di len. Lis dificoltâts par menâ jù i lens dai boscs di Musi a àn fat che par une cierte dade di timp si dopràs ancje un trenut o decauville. La ferade e je stade fate tra i agns dîs e vincj dal Nûfcent. Lis sinis di Vedronze, dulà che a jerin logâts il dipuesit, la see eletriche e la pese, a rivavin fin a Tanamee, ma dopo a son stâts puartâts fin in Palon, viers Siele Carnize. Cul completament de trate Musi-Tanamee de strade par Žaga, la piçule ferade no à servît plui e e je stade gjavade tra il 1932 e il 1935.
La “see di dôs mans”, grandone, fissade tal mûr le dopravin in doi oms par fâ breis di len. Il tronc di len, di fâ jù in breis, si poiave suntun cavalet e si leave a strent; po cul fîl colorât si segnave la linie di tai de see. Cheste e vignive doprade di doi oms, un metût adalt, chel atri, par tiere, a fuarce di braçs al sburtave insù la see.
La sega a telaio è una sega di piccole dimensioni il cui telaio è costituito da tre listelli di legno intersecati. Ad un lato dei montanti è fissata la lama mentre all’altro e fissata una corda di canapa che serve a darle la giusta tensione (allentata o tesa). La trazione della lama è ottenuta tramite la torsione della corda esercitata da un apposito tenditore. Il tenditore è costituito da una stecca di legno detta nottola.
Il seot al è une see piçule fate cuntun telâr di trê listei di len incrosâts. Di une bande dai montants e je fissade la lame intant che di chê altre e je fissade une cuarde di cjanaipe che e covente a dâi la tension juste (plui smolade o plui tirade). Par tirâ o smolâ la lame si zire la cuarde cul tendadôr, fat di une steche di len.
Par fâ segns taronts su lis breis si doprave il compàs, invezit par fâ incisions paralelis sul len, si doprave il senadôr, fat di doi bachets paralêi, blocâts par traviers di un toc di len. Insom dai bachets a son dôs pontis di fier. La ponte pressade sul len e ingjavave un segn dret su la bree, bon par inviâ la see.
Il cartabon, une sorte di scuare fate di doi elements di len unîts di un pivot che al permet di sierâ o di vierzi, e podeve riprodusi la angolazion di un tai intal câs che no fos stade di 90°.
La sgoibe di sgjavâ, cun mani di len e lame taronde di fier e jere doprade par sgjavâ il len in mût di formâ la scanaladure e fâle plui vualive. Par esempli, chest imprest al pues jessi stât doprât par sgjavâ il fonts dal laip di len fissât adalt tal mûr.
La sgoibe cu la ponte pleade, come une sedon, si doprave invezit par intaiâ superficiis starondadis o ben, par esempli, par tornî il didentri di un vâs vueit o in altris ponts dulà che al jere dificil podê rivâ cu lis sgoibis dretis.
Si cjatin in mostre ancje furducjis di diviersis dimensions che a son imprescj cul mani di len e cuarp sutîl di fier cu la ponte a bovul. Si dopravin par sbusâ il len.
A son ancje splanis, sponzarolis, limbei e sgrossins doprâts par splanâ il len. I strentôrs, di plui formis e grandecis, a servivin invezit par tignî fer il toc di len che si veve di lavorâ.
Infin si fâs notâ che a son diviersis sieraduris di puartis o di puartons.
Multimedia
La instalazion multimediâl e mostre filmâts interessants su:
– il paîs di Micotis prime dal taramot,
– il mulin vieri di Micotis,
– cemût che si fâs un côl,
– il lavôr di filadure de lane, insegnât di Albino Micottis,
– cemût che si fâs un zei, insegnât di Albino Micottis.
heart