Tal plan tiere dal museu a son esponûts ancjemò altris robis interessantis e tra chei la muele a spale. 

Le je une sorte di casse retangolâr di len cun dentri une scansie pai imprescj e lis robis dal gue,  la muele di uçâ colegade cuntun sisteme di trasmission, un plan di poie e un contignidôr pe aghe che e disfredave la muele. La casse e veve dôs cenglis di corean che si fissavin tes busis fatis di pueste te casse e che a permetevin di puartâle daûr schene. La muele si le faseve zirâ cuntune pedaliere midiant di une cengle e une cidule e di une ruede motore. La grande ruede po e moveve la muele cu la cengle di trasmission.

Al è ancje un banc di marangon, une poie di len cun intaiadis scanaladuris a diviersis altecis. Midiant di un baston di fier, su di chestis al vignive fissât un supuart e su chel si poiave il toc di len dilunc de lavorazion.

Inte vetrine cuntun scansel a son conservadis cjartis.
Tra chestis al risalte un manuscrit di une composizion di bonsignôr Ivan Trinko di Tercimont in comun di Savogne (1863-1954). Al à vût un puest impuartant in cjamp culturâl, artistic, storic e politic e al è stât par passe mieç secul mestri, vuide, pont di riferiment dai predis e di dute la comunitât slovene de Provincie di Udin. I predis slovens si son impegnâts tant inte difese de lenghe slovene intes celebrazions liturgjichis cundut de contrarietât dimostrade des autoritâts politichis e eclesiastichis intai lôr confronts dopo de anession de Sclavanie ae Italie, sucedude intal 1866.

La Italie e à inviât di fat un procès di nivelament e assimilazion culturâl di chestis popolazions. Il Giornale di Udine dai 22 di Novembar dal 1866 al scriveve cussì: “Questi Slavi bisogna eliminarli, col benefizio, col progresso e colla civiltà. (…) Adopereremo la lingua e la coltura di una civiltà prevalente qual è quella italiana per italianizzare gli Slavi in Italia (…)”. Tacant dal 1870 il sloven al è sparît dai rituâi religjôs des glesiis di Lusevare e Vilegnove. Te scuele e je stade metude in vore di assimilazion. Cun di plui, il Stât al à dimostrât dut un disinterès pes cundizion di vite ben duris di cheste int. Un esempli di no crodi di cheste mancjance di considerazion pe comunitât de val al è chel de centrâl idroeletriche di Vedronze. Cheste e furnive energjie ae rêt Tramviarie di Udin dal 1908, ma la energjie eletriche e je jentrade intes cjasis di Vedronze a pene intal 1919, e fintremai intal 1958 a Musi!

Dopo la fin de seconde vuere mondiâl, la Alte Val de Tor e à patît ancje la presince dal confin cu la Jugoslavie (di presidiâ par cautelâsi di eventuâi atacs che a vignissin dal Est comunist) e al è deventât, par buine part, zone militarizade cun presince di casermis, bunkers, servitûts militârs e un poligon di tîr metût propit su la strade che e puarte al pas di Tanamee, che e vignive sierade dispès par fâ esercitâ i reparts dal esercit in cheste aree. Cuant che al sucedeve, si tirave sù une bandiere rosse sul cjampanili di Musi par visâ la int di no cjapâ pôre pai tons e di stâ lontans de zone des esercitazions. Cun di plui, par agns, une organizazion segrete che e dipendeve drete dal esercit talian, e à operât su chescj teritoris par cirî di dislidrisâ la comunitât linguistiche slovene, fasint cuintri a predis, mestris e inteletuâi che a scomençavin a reclamâ i dirits culturâi e linguistics di chest popul: si à identificât il comunisim cu la lenghe slovene de int dal Friûl orientâl, cul sôl risultât di saborâ altri odi e di incagnîsi suntune popolazion za tibiade de miserie e de emigrazion.

Inte bacheche a son copiis dal setemanâl “Matajur” fondât intal 1950 e dal bimensîl “Dom” fondât intal 1966, stampâts de comunitât slovene, che a àn fat di supuart ae rinassite culturâl de Sclavanie.

La instalazion multimediâl e presente filmâts sul taramot teribil dai 6 di Mai dal 1976.

Infin, inte ultime sale dal Museu si pues viodi un documentari fat de Rai slovene di Triest e dedicât ai tancj emigrants des vals dal Nadison e de Tor che, ae fin de Seconde Vuere Mondiâl, a son stâts obleâts de puaretât a lassâ i lôr paîs par lâ a vore intes minieris in Belgjiche.